الصفحات
الكاملة
تيوب
الدستور
رسالة جلالة
الملك للدستور
موقع
زوار الأردن
موقع
جلالة الملكة
موقع
جلالة الملك

احتجاج في المقهى

كامل النصيرات

الثلاثاء 4 تشرين الأول / أكتوبر 2016.
عدد المقالات: 895

شرب (ناقص هزيمات) آخر (شفطة) من فنجان قهوته في المقهى ؛ ولملم فوضاه من على الطاولة ؛ ونظر للجميع نظرة مليئة بالغضب وضرب يده على الطاولة بشدة و صاح فيهم : يلعنكو واحد واحد ..! انتبه الجميع إليه مشدوهين ..واحدٌ ترك (بربيش الارجيلة) و واحد ترك أوراق الشدة وفتح عينيه كأنهما مُنهلان ..وآخر رجفت كاسة (الشاي الحليب) بيده و طرطش على ملابسه ..وآخر سكّر مكالمة تلفونية قائلاً بسرعة : بعدين بنحكي ؛ بعدين بعدين ..!

المهم أن الجميع انتبه إليه ..و انتظروا أن يكمل صراخه..ولم يكمل إلا بجملة واحدة أخذ يكررها كالملموس : الله يلعنكو ..الله يلعنكو ..! ولم يسكت إلا بعد أن قاطعه أحدهم وهو يشعل سيجارته : حيلك حيلك ..الله يلعنّا على شو ..هدي أبو الشباب ..مالك علينا ..؟! وقال آخر : شو حد سرقك ..حد شمطك كف وما عرفت مين هو ..ليكون حد فاز عليك ستة صفر في مبارة وحاط الحق علينا ؟؟؟

واصل ناقص هزيمات كلامه : لالا .ابدا ..بس حكيت الله يلعنكو لانكم قاعدين و الدنيا حواليكو خربانة ...مش عيب تقعدو وكل اللي صاير حواليكو بصير وانتو قاعدين تتفرجوا ؟؟ قال احدهم ساخرا : بس احنا بطلنا نتفرج ..خلينا الفرجة إلك ولأشكالك ..؟ غضب هزيمات أكثر وقال : يعني عاجبكم عزاء بيريز ..عاجبكم اتفاقية الغاز ..عاجبكم مذابح حلب ..عاجبكم رئيس الفلبين شو بيحكي عن أوباما ..عاجبكم عاجبكم ..؟

قاطعه أحدهم وهو مندهش : طيب وشو بدك إيّانا نعمل ..؟ فقال هزيمات : اعملوا أي إشي ..أي إشي ..! فقال آخر : اشي مثل ايش ..حدد ..؟ فبهت ناقص هزيمات وقال : هاااا ..مش عارف اشي و بس ..!! يعني ما بتقدروا تعملوا إشي ..؟ فقالوا له : لا والله ..! ضحك هزيمات ضحكة مجلجلة وقال : آسف ؛ والله كنت أفكركم قادرين تعملوا اشي وإنتو ما بدكم ..خلص خلص ؛ حقكم عليّ ..مش الله يلعنكو ..يا اسماعيل : نزل للشباب طلبات على حسابي ؛ بلا غاز بلا مذابح بلا فلبين و باكستان ..!

رئيس مجلس الإدارة: محمد داوودية - رئيس التحرير المسؤول: مصطفي الريالات - المدير العام: الدكتور حسين العموش