الصفحات
الكاملة
تيوب
الدستور
رسالة جلالة
الملك للدستور
موقع
زوار الأردن
موقع
جلالة الملكة
موقع
جلالة الملك

نام العصر وافعلْ ما تريد

كامل النصيرات

الخميس 19 تموز / يوليو 2018.
عدد المقالات: 897

الآن صحوت من نومة العصر..طبعاً لستُ معتاداً عليها بشكل دائم ؛ بس إذا لاحت و توفّرتْ فرصة إلها ؛ على طول أحط راسي عَ الوسادة وأقول ( أأأأخ آآآآآآآخ ) ..سمعتُ أن نومة العصر مفيدة جداً ..فهي تخلّي الواحد يقوم ( مسطِّلْ ) ..و التسطيل في هذه الأيّام حالة ضروريّة للخروج من أي مأزق ..!! فإذا زعلان مع مرتك ..نام العصر وقوم مسطول والطخها كفّين ..وأنت معذور قايم من نومة العصر زي الملخوم ..!! وإذا كنت خايف تواجه الدكنجي أو خايف يناديك وإنت ماشي في السوق ..نام العصر وقوم روح عليه ..وقل له : شوف خيّوه ..مصاري أبيش معي ..لو حطّيت إيدك بإيد كل قرود الدنيا ..!! سيسألك الدكنجي سؤالاً فقط : ليش تحكي معي بهالطريقة ..؟؟ قل له وأنت آخر كشرة وصوت عالي : بدّك تتحمل طريقتي ؛ أنا قايم من نومة العصر زي الملخوم ..!!
قد يقودك تفكيرك ذات يوم لطلب قُرظة ( حتمية التحصيل ) من أيّ كان ..فقط نام العصر ..وعليه ..: اسمع مش فاظي لأعذارك ؛ بدي مية ليرة هسّة ..أقولك مش بدّي ..لأ ..وقوم ماد إيدك على جزدانو وخذ إللي بدك إياه ..وقول له وأنت مقفي : تَرَاهِنْ قُرظة واعذرني على طريقتي لأني نايم العصر وجايّك زي الملخوم ..!!
المهم ..تستطيع القيام بأشياء كثيرة رائعة بعد نومة العصر ..وحجتك إنك زي الملخوم ..وعندي دليل على كلامي هذا ..سأقوله لك الآن ..كل قرارات المسؤولين عندنا متى نسمع عنها ..؟؟ أكيد في نشرة أخبار الثامنة مساء..وقبل هيك نادراً ما نسمع ..طيّب ليش ؟؟ لأن المسؤول يكون نايم العصر ويقوم يشمط هالقرار وهو ملخوم ..عشان هيك ما بنقدر نحكي معه أو نرد عليه قراره ..لأن الزلمة قايم من النوم والشر يتطاير من عيونو ولا حد قادر يهمس قدامو همس..!!
ستسألوني الآن ..ما الحل ..؟؟ الحقيقة ما فيه حل ..إلاّ حل واحد فقط..وهو : الشعب كله بمسؤوليه يروح ينام العصر ويقوم ..وهيك نصير في حالة ( لَخْمة ) مع بعض..فإمّا نقطِّع بعض..أو ما حدا يحكي مع الثاني ..!! يعني على بلاطة ..لو نام الزلمة العصر ونامت الحرمة زيّو ..وقاموا ..إذا ظربها لأنو ملخوم ؛ ستضربه لأنها ملخومة ..ولو ذهب للدكنجي بعد نومة العصر وتفشخر عليه ؛ ويكون الدكنجي الثاني نايم العصر ؛ لن يتحمل فشخرة صاحبنا وبالوزنة يروح طاسو بِنُصْ راسو..وإذا المسؤول طلع قرار بعد نومة العصر ..والشعب صحي بعد نومة العصر ؛ هات قظِّبْ وهات قطِّبْ ..!!
قلتُ لكم : أكتب لكم بعد نومة العصر ..فاعذروني ..لأني أكتب وأنا زي الملخوم...!!

رئيس مجلس الإدارة: محمد داوودية - رئيس التحرير المسؤول: مصطفي الريالات - المدير العام: الدكتور حسين العموش